كل سنه وانتم طيبين

كل سنه وانتم طيبين بمناسبه عيد الاضحى المبارك

وبمناسبه السنه الجديده ويارب يجعلها سنه سعيده علينا كلنا

وكل سنه وانتم بخير وبسعاده

تعديل

الف مبروووووووووووووووك يا اهلاويه على الفوز على المنافس التقليدى الزمالك وبجد لاعيبه الاهلى فرحونا بالعيد

وقدمولنا احلى عيديه

مبروووووووووك يا اهلاويه

حكايه الفتى الغامض

هل هو غامض؟هل لديه من الطيبه والهدوء ما يجعله ينعزل عن الناس؟هل هو رومانسى لدرجه لا نتخيلها؟ هل هو مجنون؟

كلها اسئله دارت بفكرى انا وصديقتى اليوم اثناء عودتنا من الجامعه وبعد قضاء يوم شاق ولكنه مرح

واظن انكم تتسائلون لماذا دارت هذه الاسئله بفكرنا؟ وما حكايه هذا الشاب؟

القصه بدأت عندما تعرفت عليه صديقتى بمحض الصدفه فى حوار عابر حول احد الموضوعات ومنذ ذلك اليوم لفت انتباهى هذا الشاب لم اكن اعلم السبب ولكنى شعرت بانه مختلف

ودارت الايام وقد كنا نلاحظ مراقبته لكل تصرفاتنا ولم تقتصر هذه الملاحظه علينا فقط بل اشتد انتباه الاخرين الى متابعته لنا فى كل الاماكن التى نذهب اليها ولكننا لم نبالى كثيرا بهذا الامر

ومرت الايام وازدادت مواقفه الغامضه نحونا فيوم يعاملنا بكل هدوء ومرح ويوم يعاملنا بامتعاض وكراهيه

وقد احترت انا وصديقتى فى هذه الشخصيه ولم نستطع التوصل الى تحليل نهائى لها

ولم نكن نحن الوحيدين الذين انتبهنا الى اختلافه عن الاخرين بل زملائنا الاخرين لاحظوا ذلك وقد اكتشفوا ذلك اكثر فى الرحله التى نظمتها الكليه فقد كان الجميع مندمج فى اللعب والمرح ولكنه كان يسير وشط الاشجار ويتمتم ببعض الاغانى حتى انهم سخروا منه

ولكنى بعض سماعى لهذه القصه وبعد العديد والعديد من المواقف التى جمعتنا بهذا الشاب ازداد فضولى لمعرفه مكنون شخصيته ولكنى للاسف لم استطع التوصل الى اى اجابه

احيانا المح فى عينيه لمحه من الحزن

واحيانا اخرى المح فى عينيه رومانسيه فياضه

واحيانا اشعر بانه مجنون من بعض تصرفاته

واحيانا اشعر بانه يرسم هاله من الغموض حوله

ولكنى فى النهايه مازلت اقف عند استنتاجاتى ولم استطع فك شفره هذا الشاب المحير ولازلت لا اعرف لماذا لفت انتباهى بغموضه المبالغ فيه

واتمنى ان اصل الى اجابه لاسئلتى

بجد يا جماعه انا مش عارفه انا كتبت الكلام ده ليه بس انا حسيت انى عايزه اكتبه فكتبته" ....... معلش بقى"

سجل يا تاريخ

بعد الصور دى مفيش كلام ممكن يتقال

مليوووووووووووووووون مبروووووووووووووووك على الانجاز التاريخى ده

واجمل مركز تالت لاحلى واوفى لاعب رقم 3 اللاعب الخلوق "محمد عبد الوهاب" الله يرحمه

حفله جامده جدا

الصور اللى انتوا شايفينها دى صور حفله النهارده اللى كانت فى الكليه عندنا وكان نجومها

"محمد احمد ماهر -جنات-محمد نور"

بجد كانت حفله جامده جدا بدأت الحفله بفقره محمد احمد ماهر وكانت فقره حواريه شويه بس كانت لذيذه والفقره التانيه كانت فقره الصاروخ الجديد فى عالم الغناء جنات واللى اثبتت انها بتتمتع بصوت جميل وكاريزما عاليه جدا وكانت فقرتها مميزه جدا

وزى ما بيقولوا ختامها مسك ففعلا كان ختام الحفله بتاعتنا مسك وكانت اخر الفقرات فقره محمد نور او "ميدو" الاسم المشهور بيه بين الشباب وكان استقبال محمد نور استقبال حار جدا لدرجه انه فضل واقف حوالى 5 دقايق مش عارف يغنى من الطلبه اللى فضلوا يقولوا "بنحبك يا نور.... تعالى يا نور" وغنى محمد نور اغانى البومه الجديد فى وسط تفاعل شديد جدا مع الطلبه اللى موجودين

وكان المفروض ان الفنان احمد حلمى يكون ليه فقره فى الحفله دى لكنه اعتذر ومجاش

وده كان ملخص بسيط لحفله من حفلات كليه الاعلام اللى بتقام تقريبا كل اسبوع

اه نسيت اقولكم فيه حفله تانى يوم الاربعاء بس لسه مش عارفه مين نجومها اعدكم بتقرير شامل عن الحفل القادم

مراسله البلوجات من داخل كليه الاعلام

دودى

كلمات

هذا هو الاهلى وهؤلاء هم ابنائه

اخلاق+وفاء+اخلاص= الاهلى

وقفااااااااااااات

الحريه هى المفتاح الحقيقى لباب الكنز داخلنا .......وفى سبيل الدفاع عنها يهون كل شئ ........فهى سر الانسانيه والوجود

rose

one rose could say more than thousand words

مبرووووووووووووووووووووك

مبروووووووووووووووووووووووووك للاهلى ومليووووووووووووون مبرووووووووووك لكل الاهلاويه على البطوله الغاليه وعقبال كل البطولات ودى بقى لابو تريكه حبيبنا اللى فرح مصر كلها

ابو تريكه يا فنان العب كمان وكمان

قسم وهات اجوان وقلوبنا تدعيلك

هااااااااااااااااااااااااام جدا

الى كل محبى وعشاق النجم عماد متعب عنوان منتدى "عشاق النجم العالمى عماد متعب"اللى انا بتشرف انى عضوه فيه هتلاقوا فى المنتدى ده كل اخبار النجم عماد متعب واخبار الاهلى كمان وكل حاجه عايزين تعرفوها عن عماد واحب اوجه شكر لمؤسس المنتدى ده الباشمهندس محمد نجم من طنطا واللى مش هتصدقوا انه عنده 18 سنه وعمل المنتدى الرائع ده

http://emadmet3b.fr-bb.com

والى كل محبى وعشاق النادى الاهلى العظيم ده عنوان منتدى محبى الاهلى واللى هتلاقوا فيه كل المعلومات والاخبار اللى انتوا عايزينها

http://www.ahly4ever.com

عيد سعيد

العيد فرحه .................. هييييييييييييييه هييييييييييييييييييييه
واجمل فرحه................ هييييييييييييييييه هيييييييييييييييييه
يجمع شمل قريب وبعيد
سعدنا فييييييييييها
بيخلييييييها
ذكرى جميله لبعد العيد
هاااااااااااااااااااى يا جماعه وحشتونى كلكم ووحشنى جو البلوجات اووووووووى وادى الايام المباركه عدت بسرعه وجه العيد بفرحته وجنانه وخروجاته والكحك بقى والكلام الجامد ده.
كل سنه وكلكم طيبين وبخير وبسعاده ويارب يجعل ايامنا كلها اعياد فى اعياد.
عارفين عندى مواضيع كتيره عايزه اقولكم عليها وحاجات كتير نفسى اكتب عنها الواحد بقى استعاد نشاطه بعد غياب طويل.
عارفين اكتر حاجه حلوه فى العيد الذكريات الجميله اللى حصلت فى الاعياد اللى فاتت من اول لمه العيله عشان يعملوا الكحك لحد البمب والصواريخ والحرب اللى بتتعمل بيهم والمقالب الجامده اللى بنعملها فى الكل وكمان اننا بنشوف ناس ممكن يكون عدى وقت كبير من غير منشوفهم.
وووووووووووو ............. ووووووووووو ............ بس كده
وكل سنه وانتو كلككككككككككككم بخير وسعاده

رمضان كريم

كل سنه وانتم طيبيين ورمضان كريم وسعيد على الجميع

متكتروش من الياميش والحلويات يابنات عشان الدايت

نتقابل بعد رمضان ان شاء الله علشان اعرف استمتع بروحانيات الشهر الجميل ده

وكل سنه وانتم طيبيين مره تانيه

ورمضاااااااااااان كرييييييييييييم

فضفضه

عارفين يا جماعه انا طول عمرى كان نفسى اخلص المدرسه وادخل الجامعه عشان كنت مخنوقه من دراسه مواد مبحبهاش وحاجات تانيه كتير بس لما دخلت الكليه اكتشفت انى فقدت حاجه مهمه اوى فى حياتى عارفين ايه هيه ؟؟! صاحبه عمرى نوران الشهيره ب " شمعه
انا لقيت ناس كتير اعرفهم واتعرفت على ناس لذاذ جدا بس مقدروش يعوضونى عنها وقعدت مع نفسى افتكر مغامراتنا فى المدرسه وفى المواصلات وفى الدروس ياااااااااااااااه بجد كانت ايام حلوه اوى مش هتتعوض ابدا
عارفين بالرغم ان انا ونوران مختلفين فى شخصياتنا الى اننا متفاهمين جدا - ما شاء الله – يمكن بنكمل بعض يمكن شخصياتنا قريبه من بعض واحنا مش واخدين بالنا كل شئ جايز بس المهم ان احنا متفاهمين
معلش هرجعكم لوراء حوالى 6 سنين احنا كنا فى الاول خمس اصحاب بيتحلف بينا فى كل حته وفضلنا نتصفى لحد مفضلتلى نوران فى الاخر وده لان الحاجه الكويسه هى اللى بتفضل للواحد
نرجع تانى لحياه الجامعه بالرغم من انها لذيذه والكليه بتاعتى دى دماغ على الاخر وانا مبسوطه فيها على الاخر الحمد لله الا ان حاله افتقاد الانتيم دى صعبه جدا ربنا يحلها بقى
ارجع لنوران تانى احنا كنا اصحاب اوى من ابتدائى بس صحوبيتنا جمدت اوى فى ثانوى بعد حالات افتراق ومشاكل وخصام كتير اوى فى اعدادى ونوران فيها حاجات كتير اوى انا بحبها زى انها طيبه اوى وبتسمعنى اوى ومخلصه ومش سوسه ولا بتاعه مصلحتها زى اصحاب اليومين دول اللى انا بسميهم " اصحاب تيك اواى " وبحب عقلها وصراحتها اللى انا كنت بضايق منها فى الاول بس بعد كده فهمت ميزتها وبحب فيها حاجات كتيييييييييير اوى لو قعدت اقولها عايزلها بلوج لوحدها
بجد يا نوران افتقدتك جااااااااااااااااااااااااااامد اوى بس عايزين نحل الموضوع ده بالخروجات والمكالمات والبلوج اللى هيخلينا على اتصال دائم وربنا يديمها علينا نعمه ونفضل اصحاب لاخر العمر يااااااااااااااااارب

تقرير 2 من داخل اسوار كليه الاعلام جامعه القاهره
النهارده كان فيه حفله منظماها اسره الحريه اللى انا بتشرف بانى عضوه فيها وحضر الحفل محمد عدويه ورامز جلال واكرم حسنى مذيع ال اف ام
تصدقوا اول مره اعرف ان رامز جلال ليه الشعبيه الكبيره دى عند البنات ده اول ما جه الموبيلات اشتغلت بين البنات وجامعه القاهره كلها بقت عندنا

حفل الاستقبال

هييييييييييييييه النهارده كان اول يوم فى الجامعه اينعم مكنش فيه محاضرات بس كان يوم جاااااااااااامد جدا
كانوا عاملين لنا النهارده حفله استقبال وكانت جميله اوى " اليكم الحفله بالتفصيل "
بدات الحفله طبعا بالترحيب بالطلبه الجداد عن طريق امينه اتحاد الطلبه وبعدين كلمه عميده الكليه د/ ماجى الحلوانى والوكلاء والدكاتره وبعدين تكريم طلبه الثانويه العامه الاوائل وكان فى المكرمين بنت جايبه 411 من 410 فاشله مش كده ؟؟! يالا ما علينا المهم بعد رغى كتير وافلام تسجيليه عن الكليه وتكريم اوائل الدفع السابقه استئذن الدكاتره كلهم والعميده والوكلاء وافتكرنا ان الحفله خلصت لكن لقينا ان بتوع اتحاد الطلبه بيقولوا خليكم الحفله لسه مخلصتش ومش قادره اقولكم على الحصل بعد كده دى جى واغانى ورقص وغناء ولا كاننا فى فرح او عيد ميلاد بس العيشه كانت لذيذه
وطبعا مواهب الكليه صدعتنه بس كان فى ولد صوته حلو ودمه خفيف وخلى المدرج كله واقف على رجل وبعدين لقناهم بيقولوا انهم هيعرضوا فيلم " واحد من الناس " اللى يحب يتفرج عليه يخليه قاعد بس انا بصراحه مقعدتش عشان انا شوفته قبل كده وكنت خلاص هاموت من التعب
بس عارفين اكتر حاجه غاظتنى اوى ان مصطفى شعبان مجاش انتوا طبعا عارفين انه خريج الكليه عندنا ومتعود يحضر حفله الاستقبال كل سنه بس اعتذر عشان مسافر يحضر المونتاج بتاع فيلمه الجديد بس هما قالولنا انه وعدنا بحفله بعد رمضان ومحضرلنا مفاجاه كبيييييييره جدا وادينا هنستنه
وده كان اول يوم ليه فى الكليه واوعدكم بالمزيد من الاخبار من داخل اسوار كليه الاعلام جامعه القاهره

لحظه وفاء

بالطبع شاهدنا جميعا مباراه الاهلى والصفاقس فى تصفيات افريقيا وهى المباراه الاولى التى يلعبها الفريق بعد رحيل النجم الخلوق محمد عبد الوهاب وكم وضح مدى التاثر على وجوه لاعبى الاهلى وازداد التاثر عندما شاهدوا صور الراحل فى المدرجات وسمعوا هتاف الجماهير التى ظلت تهتف " وحياتك يا عبد الوهاب الكاس على الابواب " لتبث روح الاصرار والعزيمه فى نفوس اللاعبين لتحقيق الفوز واهدائه الى روح الفقيد
وبدات المباراه ووضح مدى اصرار لاعبى الاهلى على الفوز وتوالت الهجمات حتى حصلوا على ضربه حره غير مباشره وتوجه لها الفنان محمد ابو تريكه وارتسمت على وجهه مسحه حزن كبيره عندما بحث عن زميله الذى يلازمه فى تنفيذ هذه الضربات وسدد ابو تريكه واحرز هدف جميل وتفاجانا جميعا بدموع ابوتريكه وادركنا انها دموع الحزن على فراق رفيقه ولكن السبب الحقيقى اوضحه هو بنفسه عندما قال انه شاهد محمد عبد الوهاب والكره فى الشبكه فى حوار خاص له مع جريده الاهلى وقد اوضح هذا الحوار جوانب رائعه فى شخصيه الكابتن محمد ابو تريكه فلنرفع القبعات لهذا النجم الخلوق الاصيل ولكل نجوم الاهلى المخلصين

خاص لمحبى الراحل محمد عبد الوهاب
" وصيه عبد الوهاب لاسرته وزملائه " مقال من جريده الاهلى عدد الخميس 14/9
كثيرون هزهم رحيل محمد عبد الوهاب لاعب الاهلى ربما لانه استشهد فى الملعب وهو يؤدى عمله بكل التزام وانضباط والكره بالنسبه للاعب المحترف عمله وكثيرون ايضا احبوا هذا اللاعب لادائه وسلوكه وانضباطه
ومن فرط حب الكثيرين للراحل الجميل راه الكثيرون فى المنام وفى رؤيا صادقه حكى قارئ الاهلى قصه بداها بقوله – عبد الوهاب بيسلم عليكم جميعا وهو بخير والحمد لله- وقال اقسم بالله ساقول ما شاهدته صدقا فى منامى
رايت محمد عبد الوهاب جاءنى فى صوره جميله ووجهه منور ويلبس ثياب الاحرام البيضاء وقال لى مبتسما " انت زعلان علشان ملحقتنيش طب انا جتلك اهه وتعالى معايا علشان تشوف مكانى واشار الى مكان القبر ... رايته فى ربوه عاليه تحيطها اشجار صغيره ترتفع عن سطح رمال بيضاء تتلاحم فى بعضها بفروعها الصغيره .... ونظر الى وقال : كنت افضل دائما هذا المنظر الجميل ..... قلت له : واين تجلس انت والاشجار صغيره ؟ قال : افضل الجلوس تحت هذه الشجره الكبيره لكنى اريد من امى وزملائى ان يرووها بالماء .... اريد ان يذهب ابى الى المسجد بالماء ... الناس هنا صايمه ... عايزين يفطروا
الكلام ما زال على لسان القارئ : كنت امسك بيده ونحن نسير معا ... فقلت له : ممكن احضر انا الماء ؟ فقال : ارجوك وانت بتصلى تقرا لى سوره يس وانا هامشى دلوقتى واجيلك تانى ... علشان انا رايح الان للنبى محمد صلى الله عليه وسلم علشان استلم الجايزه الكبيره ... فقلت له وانا امسك بيده وكانى فى يقظتى وكاننى لم اكن نائما : اريد ان اشاهدك وانت تتسلم هذه الجائزه لكنه لم يرد على واذ فجاه صوت اذان الفجر يخترق اذنى ويوقظنى من هذا المنام فاستيقظت وانا لا ازال اشعر بيده فى يدى حتى بعد اليقظه
رحم الله محمد عبد الوهاب واسكنه فسيح جناته

شكر واجب
شكر الى النادى الاهلى الذى لا يتخلى عن ابنائه فى كل الظروف والذى يضرب المثل للاخلاق الحميده فشكرا للنادى الاهلى وجميع من شاركوا فى مهرجان الوفاء الذى كرم فيه فقيد النادى الاهلى محمد عبد الوهاب

اعتذار
معلش يا جماعه على البوست الدراما ده بس اوعدكم ان اللى جاى هيبقى لذيذ

دكتور نفسانى حضرتك

بعد الخروج من دوامه الاحزان وبعد تصليح الكمبيوتر حبيت اعمل التاج اللى بعتهولى الباشمهندس محمد واحب اقوله مرسيه اوى على التاج ندخل فى الموضوع بقى

هل انت عقلانى اكتر ام عاطفى ؟
كنت عاطفيه زياده عن اللزوم فى الاول بس دلوقتى حكمت عقلى وعملت خليط ما بين الاتنين لانى لقيت ان العاطفى مبقاش ينفع فى الزمن ده ممكن نقول انى خليط بين العقل والعاطفه

صف شخصيتك فى خمس كلمات ؟
سؤال صعب جداااااااااااااا بس هاحاول على قد مقدر انا والعياذ بالله من كلمه انا " طيبه – اجتماعيه – عصبيه – كنت رومانسيه – مش عارفه اكتب حاجه تانيه ممكن نوران هى اللى تكمل وتقول الحاجات دى صح ولا

اذا كان لكل انسان شبيه من الحيوانات اى حيوان يشبهك ؟
السؤال ده مش عجبنى خالص لان ربنا كرم الانسان وخلاه احسن المخلوقات الموجوده على الارض فطبيعى ان مش هيكون ليه شبيه من الحيوانات

ما هو لونك المفضل؟
بحب الازرق اوى وبالذات لون السماء ولون البحر

هل انت اجتماعى اكثر ام منعزل ؟
انا الحمد لله اجتماعيه وبحب الناس اوى وبحب اللمه جدا ومبحبش العزله غير وانا زعلانه او مضايقه بس

ماذا يشكل اصدقائك بالنسبه لك ؟
حاجه مهمه اوى فى حياتى

هل انت مرتبط بعائلتك ؟
اه الحمد لله مرتبطه بيهم جداااااااااااااا هو فيه حد يقدر يعيش من غير اهله ربنا يخليهم ليه يارب

هل انت عصبى اكتر ام هادئ ؟
انا عصبيه جدا جدا جدا بس انا من النوع اللى يطلع يطلع وينزل على ما فيش يعنى اتعصب شويه وازعق وبعدين ولا كأن فيه حاجه حصلت ....... مجنونه مش كده

هل تفضل فصل الشتاء ام الصيف ؟
بحب الشتاء جدا بيبقى هادئ وجميل ممتع بجد وانا بحب اروح اسكندريه فى الشتاء جد اعشان المطره اللى انا بحبها جدا بجد فصل الشتاء احلى من الصيف حتى فى اللبس

متى اخر مره بكيت فيها ؟ ولماذا ؟
اخر مره بكيت فيها عند سماعى خبر وفاه محمد عبد الوهاب ودى اكتر مره فى حياتى كلها اعيط العياط الهستيرى ده ربنا يرحمه ويخفف عنه ويرحمنا احنا كمان

فى الاخر احب اقو ل للباشمهندس محمد الف شكر على التاج الجميل ده ومعلش انى اتاخرت فى عمله معلش الظروف كانت ملعبكه خالص ربنا يجعلها اخر الاحزان بقى ويخليلى الكمبيوتر وما يبوظش تانى

وداعا محمد عبد الوهاب

مازالت الصدمه تتملكنى منذ سماعى خبر رحيل "محمد عبد الوهاب " ومازال قلبى ينفطر من الحزن والاسى ومازال الخوف يقتلنى ومشاعر مضطربه وكثيره لا استطيع وصفها
لا استطيع ان اصف لكم مدى الحزن الذى يتملكنى ويعتصر قلبى فقد عرفت هذا الشاب وتعاملت معه مثله مثل باقى لاعبى النادى الاهلى بصفتى عضوه من اعضاء هذا النادى ولمست فيه الهدوء والطيبه والتدين والتواضع وصفات اخرى كثيره
اشعر وكان اخا لى قد رحل وليس لاعب كره لا يمت لى باى صله
قادتنى قدمى الى مقر النادى الاهلى بالجزيره اليوم عندما دخلت من البوابه رايت وكان النادى متشح بالسواد وقفت شارده امام ملعب " مختار التتش" الذى شهد اخر لحظات لمحمد عبد الوهاب فى دنيانا احسست وكانى ارى كل ما حدث بالامس بكيت وانهمرت دموعى عندما تذكرت انى رايته منذ 15 يوم فقط على هذا الملعب وتحدثت معه واصررت على التقاط صوره تذكاريه معه وشاهدت مدى حب الناس له ومدى تعلق الاطفال به وحبهم له بالرغم من عمره القصير بالملاعب
وازدادت دموعى انهمارا عندما تذكرت منظره بالامس وهو محمول على الاعناق فى صندوق خشبى
وافقت من شرودى على صوت سيده تقف بجانبى امام الاستاد تبكى بحرقه وتدعو له بالرحمه والمغفره وهذا حال كل من يمر امام الاستاد يقف امامه ويترحم على الفقيد ويتمتم ببعض ايات القران الكريم ويسرع فى مغادره المكان قبل ان تغلبه دموعه
رحل "محمد عبد الوهاب" ولفظ انفاسه الاخيره فى المكان الذى طالما احبه وطالما تمسك به وكانه اراد ان يترك لنا رساله وهى انه يحب هذا المكان واختاره ليكون اخر مشهد يراه قبل ان يرحل وان قلبه ظل ينبض بحب هذا المكان حتى اخر لحظه فى حياته
فوداعا " محمد عبد الوهاب " لقد رحلت عن دنيانا ولكنك ستظل فى قلوبنا حتى النهايه
رحمك الله وغفر لك ذنوبك وجعل قبرك روضه من رياض الجنه واسكنك جنه الخلد وجعل اعمالك الصالحه فى ميزان حسناتك
اتمنى من الله ان يستجيب لدعائى ودعاء الملايين من الناس الذين يدعوا له وان يلهم اهله وامه الصبر والسلوان
رحمك الله يا محمد وصبر قلوبنا على فراقك لنا
ارجو قراءه الفاتحه على روحه الطاهره والدعاء له فنحن لا نملك الا الدعاء

عزاء واجب

لقد رحل عن عالمنا اليوم لاعب الاهلى والمنتخب الوطنى لكره القدم محمد عبد الوهاب اثر ازمه قلبيه اثناء التدريب الصباحى بالنادى الاهلى عن عمر يناهز 23 عاما

ادعو كل من يقرا هذا النعى ان يدعو له بالرحمه والمغفره وان يسكنه الله فسيح جناته وان يوسع عليه قبره ويجعله روضه من رياض الجنه وان يلهم اهله الصبر على هذا الفراق

اسالكم قراءه الفاتحه والدعاء له

وان لله وان اليه راجعون

حب فى كى جى تو

اكتشف علماء النفس مؤخرا ان الاطفال الصغار يتبادلون مشاعر الحب مع بعضهم البعض وباحساس صادق ويرتبطون بنوع من الصداقه يساعدهم على بناء حواسهم بطريقه جيده ويكونون عالما خاصا بهم وبمشاعر ناضجه للغايه ولذلك ينصح العلماء الاباء والامهات بالا ينزعجوا اذا اكتشفوا وجود قصه حب تربط الابن او الابنه بزملائهم فى الحضانه او المدرسه واصبحت قصص الحب بين الاطفال حقيقه مؤكده وامر غير قابل للجدل خصوصا بعد الدراسات الطويله والشاقه التى قام بها العلماء

الكلام ده قريته فى مجله وشدنى جدا وطبعا المقال اطول من كده بكتير بس انا كتبت حاجه صغيره منه
بقيت المقال جايب امثله وحوادث على الموضوع ده حصلت بجد ورأى علماء النفس والمدرسين فى الموضوع ده ورد فعل اولياء الامور وانهم كتير بيتصرفوا فى الموضوع ده بطريقه غلط ممكن تتسبب فى ازمه نفسيه للطفل بجد موضوع جامد جدا وكان نفسى اكتبلكم باقى الموضوع بس هو طويييييييييييييل اوى
وتكفى الامثله اللى جايه عشان تبين مدى براءه الاطفال وان فيه ناس بتكبر الموضوع على الفاضى شوفوا الكلام

ملاك.......... ست سنوات
الحب اهم شئ فى العالم .............بس الايس كريم اهم

ناصر......... خمس سنوات
بدور لنفسى على بنت تحبنى واحبها اول ما اتخرج من الحضانه

ياسمين......... ثمانيه سنوات
مقدرش اتورط فى الحب حاليا لان الدراسه عندى اهم

مى............. تسع سنوات
محدش يعرف سبب الحب بس انا سمعت ان له علاقه بحاسه الشم

طارق.......... عشر سنوات
انا بقدر اعرف اذا كان الراجل والست اللى فى العربيه دول مجوزين ولا لا اذا كانوا مابيتكلموش هما اكيد متجوزين

سامى......... ثمانيه سنوات
لازم الزوج مينساش اسم زوجته ابدا علشان مايعملش لنفسه مشاكل

هذا ما قاله الاطفال عن الحب حسب ماورد ذكره فى المجله
شوفتوا الجيل الجديد ................. مصيبه مش كده

حاله وسؤال

النهارده كنت مع شله كبيره جدا من اصحاب وقرايب كده يعنى وكان اكبر واحد فينا عنده 22 سنه واصغر واحده 16 سنه "هتعرفوا انا كاتبه السن ليه بعد كده "
المهم كنا قاعدين بنلعب لعبه "بوتيل" او الزجاجه وطبعا كانت كل الاسئله عن الحب والصحوبيه والكلام ده شويه وزهقنا راح احمد شغل شريط محمد حماقى الجديد -معلش انا داخله فى الموضوع اهو- طبعا الشريط تحفه جاااااااااااااااااااااااااااامد جدااااااااااااااا المهم اللى لفت نظرى اوى والشريط شغال لما جات اغنيه "كنت تتكلم" لقيت كل اللى قاعدين سرحوا واللى عنيها دمعت وكده يعنى استغربت اوى وقولت معقول كل اللى قاعدين مروا بحدوته الاغنيه دى الفضول قتلنى وقولت امارس دور الصحفيه واسالهم روحت طافيه الكاسيت وسالت كل اللى قاعدين سؤال واحد " انت حاسس الاغنيه دى ؟ "
صدمت ان حوالى 95% من اللى كانوا قاعدين قالوا اه قولت اوضح السؤال اكتر رحت ساله " انت عشت موضوع الاغنيه دى ؟ "
طبعا نص الصبيان اتهربوا من الموضوع بس فيه منهم اتكلم واتفتح موضوع الحب حتى سن ال 20
ناس كتير قالوا ده بيبقى لعب عيال ومبنخدش منه غير ان احنا ننجرح او نتعقد
وناس تانيه قالت ان الحب ده بيبقى اصدق واطهر انواع الحب تطبيقا لنظريه الحب الاول مبيتنسيش مهما كانت عواقبه
المهم انى مطلعتش بنتيجه محدده بسبب تضارب الاراء الا ان السؤال ده فضل فى دماغى" هل الحب ده بجد بيبقى حقيقى وممكن يستمر ولا هو مجرد لعب عيال؟"
قولولى انتوا ايه رايكم فى الموضوع ده
ودلوقتى اسيبكوا مع كلمات الاغنيه اللى سببت المناقشه دى

مش كنت تتكلم شايفنى بسيب ايديك وبضيع نادينى وقولى ليه بتبيع لو غلطه هتعلم
ازاى كده هنرجع هوانا معدش زى زمان وفين يجمعنا تانى مكان الفرقه دى بتوجع
لعنيك بسهر ليالى وراء ليالى ولا دنيا حلوه بتحلالى مليت حبيبى اناديك
يرضيك كده فات كتير وانا مستنى مبقتش حاجه تطمنى وهاموت عشان الاقيك
هو انت مستكتر اعيش وانا روحى رايحه عليك طب اعمل ايه واقرب ليه ليه بس متاخر
الوقت بيعدى وليل الشوق مطمنيش حبيبى ازاى مترجعليش مرتاح لمين بعدى
لعنيك بسهر ليالى وراء ليالى ولا دنيا حلوه بتحلالى مليت حبيبى اناديك
يرضيك كده فات كتير وانا مستنى مبقتش حاجه تطمنى وهاموت عشان الاقيك

تهنئه ودعايا
يا جماعه شريط محمد حماقى يجنن بجد تحفه واللى هيشتريه مش هيندم ابدا
مبرووووووووووووك يا حماقى على الالبوم بجد روعه

الحب ....الكراهيه ....اللامبالاه

الحب ..... الكراهيه.....اللامبالاه
مشاعر انسانيه كامنه داخل الانسان ربما يهرب من حقيقه وجود اى منهم داخله ولكن كل منا بداخله هذا المشاعر
واذا دققنا النظر فى معنى كلا منهم نجد ان الفرق بينهم خيط رفيع جدا فمن الممكن ان يتحول الانسان الى اى منهم فى وقت قصير
قد يتعجب البعض من كلامى وقد لا يقتنع به البعض الاخر ولكن من واقع ما رايته وعشته وعاصرته استنتجت هذا
الم يقع انسان فى الحب من اول يوم تقع عينيه على من يحب ويعيش فى قصه حب رائعه ويتحاكى بها الناس وربما تتوج بالزواج والاطفال وتظل قصه الحب مستمره لوقت طويل
اليس من الممكن ان يتحول هذا الحب الى كراهيه او الى لامبالاه؟
ولكن كيف يحدث لك؟
وما الذى يجعل المشاعر تتبدل وتتغير على هذا النحو؟
المشاكل التى تعترض حياه اى انسان
الغدر او الخيانه من احد الطرفين
ربما تكون هذه الاسباب ولكن هناك حقيقه يغفل عنها الكثيرين وهى ان كثره الحب من الممكن ان تتحول الى لامبالاه من كلا الطرفين
والحب ايضا من الممكن ان يتحول الى كراهيه وصدقونى ابشع انواع الكراهيه هى التى تكون بعد حب كبير
وهناك دليل اخر على وجود هذه المشاعر داخلنا وهو
اليس من الممكن ان يعيش الانسان هذه الاحاسيس فى وقت واحد
فمن الممكن ان يحب ويكره ولايبالى ليس شرطا ان تكون كل هذه المشاعر موجهه لشخص واحد ولكن يمكن الجمع بينهم
الا يمكن ان يتحول الحب الى كراهيه او الى لامبالاه او قد يحدث العكس
ان الفاصل بين هذه المشاعر ليس كبيرا حتى يتم التفريق بينهم ولكنهم متشابكين داخل نفس الانسان ولا يمكن الفصل بينهم
ملحوظه

الصوره اللى انا حطاها دى انا واخداها من عند الباشمهندس محمد صاحب مدونه وعد العيون معرفش انا اول ما شفت الصوره دى جه فى دماغى الكلام ده بجد صوره رائعه وليها معانى كتير

تاج تانى

تنفيذا لدعوه جدو العزيز هاكتب التاج ده واحب اشكر جدو على الدعوه الجميله دى

هل انت راض عن مدونتك شكلا وموضوعا؟
والله بالنسبه للشكل راضيه الى حد كبير بس فيه شويه تعديلات عايزه اعملها
اما بالنسبه للموضوع فانا بكتب اللى نفسى اكتبه واللى بيطلع من دماغى بتلقائيه والحكم بقى مش ليه للناس اللى بيعلقوا

هل تعلم اسرتك الصغيره بامر مدزنتك؟
اه طبعا وساعات يدخلوا عليها ويقروا اللى انا كتباه
هل تجد حرجا فى ان تخبر صديقا عن مدونتك؟هل تعتبرها امر خاصا بك ؟
لا طبعا مبلقيش اى حرج فى انى اقول لاصحابى عن المدونه بتاعتى. وبرده مبعتبرهاش حاجه خاصه لانى لو كنت حاطه فى اعتبارى كده مكنتش عملتها من الاصل
هل تسببت المدونات بتغير ايجابى لافكارك؟ اعطنى مثال فى حاله الاجابه بنعم؟
طبعا اى حاجه جديده الانسان بيعرفها بتسبب تغير فى افكاره او على الاقل اكسابه افكار جديده وانا عن نفسى المدونات غيرت افكار كتير كانت فى دماغى وخلتنى اعرف حاجات كتير مكنتش اعرفها
المثال
انا مثلا كنت فاكره ان كل شباب مصر خلاص كبر دماغه ومبقاش هاموه اى حاجه بس المدونات اثبتتلى العكس فلقيت ان شباب مصر لسه بخير
هل تكتفى بفتح صفحات من يعقبون بردود فى مدونتك ام تسعى لاكتشاف المزيد؟
اسعى لاكتشاف المزيد اصلى فضوليه شويه
ماذا يعنى لك عداد الزوار؟هل تهتم بوضعه فى مدونتك؟
العداد بتاع الزوار مبيهمنيش كتير لان ده مش المقياس ولا اهتم بوضعه فى مدونتى
هل حاولت تخيل شكل اصدقائك المدونين؟ اعترف
ناس وناس.الشخصيه اللى بتشدنى اوى ويعجبنى طريقه تفكيرها بتخيل شكلها على اساس اللى كونته عنها من طريقه الكتابه والتفكير
هل ترى فائده حقيقيه للتدوين ؟
اه ليه فوائد كتير على الاقل تعبير عن نفسنا وعن راينا اللى مش قادرين نقوله وترويح عن النفس وتقضيه وقت الفراغ فى حاجه مفيده

هل تشعر ان مجتمع المدونين مجتمع منفصل عن العالم المحيط بك ام متفاعل مع احداثه؟
انا شايفه ان مجتمع المدونين ده مش منفصل عن عالمنا بالعكس انا شايفه انه متفاعل مع احداثه جدا وملم بكل ما يحدث فى كل المجالات

هل يزعجك وجود نقد بمدونتك ام تشعر انه ظاهره صحيه؟
لا خالص طالما النقد موجه باحترام ومقنع خلاص لكن اى نوع من انواع النقد التانيه دى انا مبحبهاش والنقد البناء ظاهره صحيه جدا

هل تخاف من بعض المدونات السياسيه وتتحاشاها؟ هل صدمك اعتقال بعض المدونين ؟
انا مبخفش من الدخول على المدونات السياسيه بس ببعد عنها لانى مبحبش السياسه ولا الكلام فيها وكمان مبفهمش فيها وانا مبحبش اتكلم فى حاجه مبفهمش فيها
اما موضوع اعتقال بعض المدونين ده فانا مسمعتش عنه قبل كده عشان اتصدم

هل فكرت فى مصير مدونتك حال وفاتك؟
لا مفكرتش بس ممكن اكتبها فى الوصيه او اوصى حد من اصحابى المقربين انه يتابعها باستمرار وينشر خبر وفاتى
اخر سؤال : تحب تسمع اغنيه ايه – بلاش صيغه امال فهمى دى – ما الاغنيه التى تحب وضع اللينك الخاص بها فى مدونتك؟
اغنيه دواير بتاعه مروان خورى او اى موسيقى هاديه

اكتب اسماء خمسه مدونين ليقوموا بهذا الاستقصاء بعدك؟

nouran

wa3d el3yoon

محمد مفيد

epitaph

snowman's feelings

وكل اللى يزرو البلوج ويعجبه ويحب يعمله

ومازالت المشكله مستمره

المشكله اللى مجننانى هى ان انا كنت كتبت السن رغبه اولى وجاتلى وانا كنت مقتنعه بيها جدا ولما روحت الكليه بعد ما جواب الترشيح جه اكتشفت ان الطلبه اللى واخدين الالمانى لغه تانيه فى الثانويه ملهمش غير قسم المانى وروسى ومجرى تقريبا وانا كنت دخلاها عشان الايطالى والاسبانى اللى انا بعشقهم واللى زاد المشكله تعقيد انهم طالبين فى قسم انجليزى درجه 48 وفى اليابانى 49 وفى الكورى 47.5 وانا جايبه 45 ففرصتى قلت اوى فقررت انى احول اعلام خاصه ان مجموعى يجيبها فانا جايبه 97% بعد اضافه درجات التفوق الرياضى وقالولى فى الكليه طلب التحويل ممكن تاخديه لما الملفات توصل وطبعا هى لسه موصلتش وانا الفتره دى عايشه فى قلق مش طبيعى لحسن موضوع التحويل يحصل فيه حاجه لقدر الله واجبر على انى افضل فى السن وادخل قسم الالمانى واللغه دى انا مبقبلهاش مع انى كنت واخداها فى ثانويه عامه بس انا كنت واخداها عشان الدرجات مش اكتر .انا عارفه انها غلطتى من الاول انى مسالتش على فرصى فى الكليه بس قدر الله وما شاء فعل و احنا بشر والغلط وارد .انا بدعى ربنا ان المشكله دى تعدى على خير وربنا يسترها وتتحل المشكله وتخلص على خير .وهبقى اقولكم الاخبار اول باول .ادعولى يا جماعه

مش عارفه اكتب عنوان

امتنعت عن الكتابه فى الفتره السابقه بسبب حاله التخبط التى لازلت امر بها حتى الان ولن توضع لها نهايه الا يوم الاحد القادم
المهم حبيت اخرج من المود ده قولت اروح السينما المهم اخواتى شبطوا فيه وروحنا فيلم كريم عبد العزيز "واحد من الناس" الفيلم اكتر من رائع بجد كريم كان تحفه والعسوله منه شلبى كانت جميله اوى والولد الصغير ابن كريم فى الفيلم زى السكر الفيلم بيتكلم عن حرب رجال الاعمال وانهم متحكمين فى البلد وحاجات من دى المهم خرجت من السينما مودى احسن شويه وانا مروحه من المول قابلت صديقى العزيز "احمد عادل" بالرغم ان المقابله كانت سريعه جدا الا انى اتبسط جدا لما شوفته
لما رجعت البيت لقيت الزمالك مغلوب فى الماتش وطبعا اتبسط جدا
وبالرغم من كل ده افرح شويه ويرجع المود ينزل الارض تانى لما افتكر الموضوع اللى مزعلنى ان شاء الله احكلكم عليه لما يخلص على خير ان شاء الله

تهنئه واجبه
الف الف مبروووووووووووووووووووك لنادى الزمالك ولكل الزملكاويه على الهزيمه الاولى فى الدورى على ايد فرقه تعبانه جدا والبقيه تاتى

تهنئه تانيه
مليون مبرووووووووووووووووووووووووووووووووووك للنادى الاهلى على الفوز الاول فى الدورى والدورى لينا السنه دى ان شاء الله برده

دعاء
ارجو من كل واحد يقرا البوست ده يدعيلى ان ربنا يحل ازمتى ويخرجنى منها على خير

التنسيق

امبارح طلعت نتيجه التنسيق على النت وجاتلى الرغبه الاولى اللى كنت كتباها وهى كليه الالسن وانا اتبسط جدا اينعم هيه ما كنتش فى دماغى خالص والاعلام كانت فى دماغى اوى بس انا بحب اللغات وهى كمان بقت مطلوبه فى كل المجالات وممكن كمان ادخل مجال الاعلام اللى انا بحبه من خلال دراستى للغات برده وربنا يوفقنى فى دراستى الجديده.انا كان نفسى اكتب لما جواب التنسيق يجينى بس اهو قولت اقولكم ومبروك ليه ولكل اللى حققوا اللى كان نفسهم فيه.وتحياتى للجميع

ملاحظات

مبروووووووووووك للباشمهندسه نوران على هندسه القاهره وعقبال لما تتخرجى

شكرا جدو العزيز على سؤالك عليه وانا مكنتش بكتب الفتره اللى فاتت عشان المود كان فى النازل

مبروك لكل اصحابى على كلياتهم الجديده وربنا يوفق الجميع

دواير

بنلف فى دواير والدنيا تلف بينا ودايما ننتهى من مترح ما ابتدينا طيور الفجر تايهه فى عتمه المدينه بتدووووووووور
مبنكتبش الرسايل مبننتظرش رد لا حد فى يوم سمعنا ولا بنسمع حد طيور العمر تايهه فى عتمه المدينه بتدووووووووور
ساكنين فى عالم يعشق الخطر فيه الطيور تهرب من الشجر وتهرب النجوم من القمر وتهرب الوجوه من الصور بنلف فى دواير ندور على الامان ونلقينا رجعنا تانى لنفس المكان ندور ندور ندور
نحلم ونحلم بالحياه المفرحه واتارى احلامنا بلا اجنحه بلا اجنحه
ندور ندور ندور بجناح حزين مكسور ساعات نشوف فى العتمه وساعات نتوه فى النور ساعات عيونا فى الاسى تفرح وساعات فى ساعه الفرح منوحه.
انا كتبت الاغنيه دى لانها تعبير عن حياتنا احنا الشباب وربنا يعناا

التحول الخطير

دايما كنت بشوف فى الافلام وبسمع الاغانى وحتى فى حياتنا العاديه ان الحب ممكن يتحول لكره مهما كانت درجه الحب ده.
ودايما كنت بقول ان اللى يحب ميعرفش يكره وكنت بعاند كل اللى كانوا بينحازوا للراى الاول وهو ان الحب من الممكن ان يتحول لكراهيه ولكن الحياه دائما ما تعطينا دروس تجعلنا نتعلم انه لا يوجد مستحيل وحصلى موقف فى حياتى خلانى اصدق ان الحب مش ممكن يتحول لكراهيه بس لا ده ممكن يتحول الى ما هو اكثر من الكراهيه واكتشفت ان اخطر انواع الكراهيه اللى بتبقى ناتجه عن حب كبير وحقيقى .
واكتر حاجه خلتنى اندهش فعلا هى ازاى انسان يقدر يخلى انسان يكره بعد ما يكون بيحبه وممكن يكون وصل لمرحله العشق!!!
المهم ان النتيجه الاخيره اللى وصلتلها ان عصرنا ده اتمسح من قاموسه معنى الرومانسيه والعشق والحب الحقيقى واصبحت الماده والمصالح هى المسيطره على حياتنا بل وعلى مشاعرنا ايضا.
فوداعا للمشاعر الجميله والصادقه واهلا بالماده فى هذا العصر الذى تحجرت فيه القلوب والمشاعر.
معلش يا جماعه دى تخاريف اخر الليل انا كتبت الكلام ده فى ورقه الساعه 6 الصبح وقولت اكتبه بجمله الجنان.

مبروك

فى وسط الاحداث اللى عماله تحصل فى لبنان والناس كلها بتتكلم فى السياسه وتعبنا من الزعل قولت اعمل هدنه وكفايه سياسه شويه وقعدت اتفرج على ماتش الاهلى وانبى وطبعا كنت بشجع الاهلى وبالرغم ان الاهلى كان بيلعب وحش اوى النهارده والفرقه افتقدت مفاتيح لعبها الاساسيه سواء للاصابه او للايقاف بس الحمد لله المتش عده وكسبنا بجون الفنان محمد ابو تريكه ودى مش حاجه جديده على نادى البطولات بس اكتر حاجه زعلت الاهلويه اوى هى اصابه احمد السيد لان الاهلى بيعانى من نقص فى الدفاع بسبب اصابه عماد النحاس وايقاف شادى محمد وانضم للقائمه احمد السيد والاهلى ادامه متش صعب فى البطوله الافريقيه بس ربنا هيحلها ان شاء الله ومبروك لكل الاهلاويه اول بطوله فى الموسم ولسه التقيل جاى ان شاء الله

مبرووووووووووووووووك

للاهلاويه بس

.

بدون تعليق

الرئيس حسنى مبارك يدعو الى احتواء الموقف المتصاعد فى لبنان

الرئيس مبارك يدعو الى وقف النار فى المنطقه ويدعو رؤساء وملوك العرب الى عقد مؤتمر عربى لحل الازمه المتصاعده

الرئيس الامريكى جورج بوش يؤيد اسرائيل فيما تفعله فى لبنان لانها تقوم بالدفاع عن نفسها ورد الاعتداء اللبنانى

رئيس الوزراء الاسرائيلى يتوعد بالرد الشرس على الهجمات اللبنانيه للدفاع عن حقوق اسرائيل

مصرع واصابه المئات من المدنيين اللبنانيين فى قصف مركز للطيران الاسرائيلى

استمرار الاشتباكات بين حزب الله والجيش الاسرائيلى

مع استمرار الاشتباكات وتصاعد الموقف فى لبنان يزداد اصرار رؤساء وملوك العرب على الموقف السلبى الذى يتخذونه ويكتفوا بالدعوه الى عقد المؤتمرات الفاشله والتى لا تتوصل الى اى حل مثل موقف رئيس جمهوريتنا

حسبى الله ونعم الوكيل

منتهى الانتماء

انا مكنتش عايزه اتكلم فى السياسه وعن موضوع لبنان بالذات مش سلبيه منى بس اصلى لما بتكلم فى السياسه بفتح على الرابع و مبعرفش اقفل بس انا هتكلم فى الموضوع بس مش بصوره مباشره .
طبعا كلنا مضايقين وهننفجر من اللى بيحصل فى لبنان وطبعا من موقف العرب السلبى اللى متعودين عليه واللى خلا اليهود والامريكان يركبونا ويعملوا اللى على مزاجهم مهم مش لقيين حد يوقفم .
المهم كنت بتصفح الجرنان زى كل يوم و كانت اخبار اللى بيحصل فى لبنان متصدره .صور وتفاصيل وغيره بالصدفه وانا بقلب جبت صفحه الفن لقيت فيها ما يلى :
نيكول سابا تستعد لحفل ساهر فى القاهره بعد الحفل الذى اقامته فى احد الانديه وقد ظهر التاثر عليها مما يحدث فى بلدها الحبيب حتى انها توقفت عن الغناء عندما غلبتها الدموع ......منتهى الانتماء
المطرب اللبنانى جاد شويرى وصل الى القاهره استعداد لاحياء العديد من الحفلات ..... برده منتهى الانتماء
منتهى الانتماء وحب الوطن شايفين الانتماء ناس بلدها متبهدله وكل يوم بيموت فيها اطفال وشباب وشيوخ ودول جايين يغنوا بجد لو حال العرب بقى كده يبقى عليه العوض ومنه العوض فينا.واخيرا ستظل لبنان صامده فى وجه العدوان وسينتصرون عليها باذن الله "ان ينصركم الله فلا غالب لكم"
وحسبنا الله ونعم الوكيل

وداع

ذهبت الى حكيم اساله ما هو العشق؟؟؟؟

قال: قلب ينفطر وعين بالاشواق كل ليله منها الدموع تنهمر حال يتغير وعقل كل لحظه من شده الخوف على المحبوب يتفجر

فسالته هل انا عاشق؟؟؟؟؟

فقال ماذا تشعر؟؟

قلت :- عندما رايتها ايقنت انى امام لوحه لم يبدعها الا الفتان ولحظه سمعتها ادركت انى اسمع تغريد صوت من الجنان عمرى لم يحسب الا برؤياها

وقلبى لا ينبض الا بسعادتها

هى اغلى على من دمى وبابتسامه منها يزول كل همى

لم اعد ارى بعينى سواها وخاطرى احتلته بعيناها

دمعه منها تغرقنى بالهم وتقتلنى لمسه منها تحيينى وتسعدنى

هى اسمى من ان تصفها كلماتى

......لذلك اشعر امام سؤالك بالعجز عن التعبير عن اعجابى

لم تكتمل هذه الخاطره اتدرون لماذا؟ لان صاحبها قد رحل عن عالمنا هذا واصبح مجرد ذكرى نتذكرها ونبكى ونحزن لفراقه لقد طويت الصفحه قبل ان تكتمل لقد غادر هذه الحياه ولم يكمل عامه ال 19 رحل قبل ان اراه او اودعه واكثر ما تسبب فى المى ان القطيعه كانت اخر ما بيننا رحم الله صديقى العزيز وابدله حياه افضل مما كان يعيشها

خواطر

مش عارفه الكلام اللى جاى ده شعر ولا خواطر كل اللى انا عارفاه انه اخر ما تبقى لى من صديق عزيز عليه جدا والحكم ليكوا بقى

من اين اتيت؟؟؟

من اعماق بحر الاحزان ام من فضاء سماء الاحلام

لماذا اتيت؟؟؟

لتحتلى قلبى ام لتحررى حبى

انا من لم يستطع الحب ان يشغل بالى اكثر من ثانتين

وقيدت العشق فى قلبى خوفا من لحظه ضعف ونسيان

ولكنك انت.....؟

من اشرقت على اشراق الشمس فى الافق

وتفتحت لها كل ابواب قلبى الموصده

واحيت فى الارق

كيف وانا ...؟

من عجز الرجال ان يهزمونى فى يوم من الايام

استسلمت لنظره من عيناك

وهزمتنى كلمه من شفتاك

واصبحت صريعا امام لمسه من يداك

بركان فيضان زلزال

بركان يجرى فى عروقى كلما ارى اعين البشر تتبعك باعجاب

فيضان من الاشواق يغرقنى الف مره اذا غبت عنى ولو فى الاحلام

زلزال يهز كيانى لو اذرفت عيناك دمعه ولو كانت بلا احزان

ماذا تريدين منى ؟؟؟

عقلى ام قلبى ام كيانى

عقلى رهن تاثيرك

قلبى قد اصبح اسيرك

كيانى ينهار امام تنهيدك

يا من غيرت حياتى!!! ماذا اقول لك؟؟؟

بكلمه منك اصبح طائرا فى الفضاء

وبدمعه منك ارى الكون امامىقد اصبح فناء

احيانا اشعر ان حبك لى قد تجاوز كل الحدود

واحيانا اخرى اشعر انه لم يصل الى المحدود

فكرت ان اوصفك ......!؟

لكن صرخ القلم فى يدى عاجزا امام عشقى وتاثيرك

عيناك ارى فيها كل املى فى الوجود

شفتاك اتمنى منها كلمه تزيل عن حياتى الجمود

يداك اريد منها لمسه اكسر بها كل القيود

قلبك اطلب منه نبضه قبل ان اموت

اخيرا استجمعت قواى لاقولها لك بلا تردد

انت حياتى التى لم تعرف معنى السعاده الا بهواك

وعمرى الذى لم يبدا ويحسب الا برؤياك

وحلمى الذى لا اريد ان استيقظ منه

واملى الذى لا اعيش الا به

اشياء تسعدنى

تنفيذا لطلب جدو العزيز أنا هاكتب عن الأشياء التي تسعدني وهي

الخروج مع عيلتى وبالذات لما بابا بيكون معانا اصله بيسافر كتير-
الخروج مع اصحابى اللى بحبه-
لما بفتكر ذكرى جميله-
لما بلعب مع "كوكى" القطه بتاعتى-

لما الاهلى بيكسب اصلى اهلاويه جدا-
لما بحقق حاجه كنت بحلم بيها-
لما بتفرج على فيلم فيه قصه حب حلوه-

لما بقعد على البحر بليل او الفجر-
لما بسمع موسيقى هاديه -

لما بركب العربيه وتكون ماشيه بسرعه-
لما بقابل حد بقالى كتير مشفتوش ويكون عزيز عليه-

لما بتفرج على صورى وانا صغيره-

لما بتفرج على صور الرحلات سواء مع اصحابى او مع عيلتى-
لما بصور بالكاميرا بتاعتى-
لما بروح دريم بارك-
لما ببقى على البلوج-
بس كده دى الحاجات اللى فى دماغى دلوقتى اكيد فيه حاجات تانيه بس كفايه اوى كده

الى المختصين

يا جماااااااااااااااااااااااااااااعه هو مفيش حد اعلام او السن خالص فى عالم التدوين ده كله يا ريت لو حد فى اى كليه من دول او يعرف حد فيهم يقولى ايه مميزات وعيوب كل كليه من دول .اصل الاتنين جامدين ومحتاره بين الاتنين محتاره .ايه ده هو انا هاغنى ولا ايه معلش يا جماعه اصلى لسه مفوئتش من وش الثانويه العامه يالا دنيا.ارجو الرد فى اسرع وقت وشكرا

النتيجه ظهرت

قولولى مبروك وكل سنه وانتى طيبه هاتقولوا ليه؟هقولكم.اصلى جبت 94% وعديت من الثانويه العامه بعد عناء وارف وتقولولى كل سنه وانت طيبه عشان عيد ميلادى النهارده وللناس اللى طلبوا الحاجه الحلوه ان شاء الله هتوصل.بس فيه ازمه ان كان نفسى ادخل اعلام ونتيجتى تجيب ان شاء الله بس الناس كلها وماما وحته ابن عمتى خريج اعلام قالى السن

مستقبلها احسن وانا برده حابه الكليه دى .حد يقولى اعمل ايه انا محتاره

اصعب احساس

طبعا فى ناس اول ما هتشوف عنوان البوست هتفتكرنى هتكلم عن خيانه من صديق او من حبيب او اى موقف صعب تانى ممكن نقابله فى حياتنا بس انا قصدى باصعب احساس هو انتظار نتيجه الثانويه العامه!! محدش يفتكرنى بهزر بجد حاجه صعبه انى ابقى مستنيه نتيجه تحدد مستقبلى كله وطريقه حياتى احساس غريب ممزوج بالخوف والترقب والحيره احساس ربنا يعدينى منه على خير .بجد يا جماعه اى حد يقرا البوست ده يدعيلى ويدعى لكل اللى زيى واكيد ناس كتير منكم عاشوا الاحساس ده وحاسيين بلى بقوله.اسفه لو الكلام مش راكب على بعضه حاله الخوف والقلق مسيطره عليه .وربنا معانا كلنا

تاج ولسه داير

استكمالا لمسيره تاج ودا ير أنا عجبنى التاج ده وحبيت اعمله
افتح اقرب كتاب ليك على الصفحة 18 السطر 4
مفيش كتب جنبي عشان افتحها
مط ذراعك قدر ما تستطيع
اوك..... آه أديني خبط في الحيطه حلو كده
ما آخر ما شاهدته على التليفزيون؟
مسلسل الست اصيله
بدون أن تسترق النظر كم الساعة ؟
حوالي 10.30 م
وكم الساعة فعلا ؟
الساعة 10.48 م
باستثناء صوت الكمبيوتر ماذا تسمع الآن ؟
صوت التكييف و صوت الأغاني اللي مشغلاها
متى خرجت من المنزل آخر مره ؟ وماذا كنت تفعل ؟
أول امبارح وروحت السينما مع أصحابي
قبل مباشرتك لهذه الاسئله اى موقع كنت تتصفح ؟
البلوج بتاع محمد مفيد
ماذا ترتدى ؟
أكيد هدوم
هل حلمت أمس ؟
مش فاكره والله
متى آخر مره ضحكت ؟
من شويه
ماذا فوق الجدران ؟
صور وشهادات تقدير
هل لاحظت شيئا مؤخرا ؟
الخوف من المستقبل بقى منتشر بين الناس بشكل غريب
ما رأيك في هذا الاختبار ؟
حلو وعاجبنى
ما آخر فيلم شاهدته ؟
عن العشق و الهوى
إذا أصبحت فاحش الثراء ماذا تشترى ؟
هاشترى طياره خاصة
أخبرني شئ أجهله عنك ؟
المفروض يتقال أخبرني شئ اعرفه عنك
إن كان بإمكانك تغيير شيئا واحد في العالم بغض النظر عن السياسة ؟
هحاول أغير نفوس بعض الناس للأحسن طبعا
جورج بوش ؟
رئيس أمريكا
لو كان وليدك الأول فتاه ماذا تسميها ؟
سارة
ولو كان صبيا ؟
حازم
قد تفكر في العيش في الخارج ؟
آه نفسي أعيش في أسبانيا أو إيطاليا أو تركيا
ماذا تتصور أن يقول الله عندما تقفي بين يديه ؟
يا رب يقولى " أنتي من عبادي الصالحين"
أربعة أشخاص تمرر لهم الدور ؟
اى حد يعجبه التاج ويحب يعمله

الهبوط الى الهاويه

هل اصبح شبابنا على حافة الهاويه ؟ام انهم سقطوا فيها بالفعل ؟هل اصبح تركيزهم منصب فقط على العبث واللهو ؟هل قضايا بلادهم لم تعد تشغلهم بالفعل ؟ام انهم يديروا لها ظهورهم؟من المسئول عن ذلك؟هل الشباب انفسهم؟ام الدوله؟ ام التربيه ؟ ام كل هذه العوامل كلها ؟ لماذا لا نحاول اصلاح ما افسده عصر الانفتاح ؟ لماذا ننتظر حتى تحدث الكارثه ثم نندم بعد ذلك ؟علينا ان نهب جميعا لنجدة شبابنا حتى نحاول انقاذ ما يمكن انقاذه وان نغلق هذة الفجوه التى تبتلع كل يوم العديد من ابنائنا

ايه رايكم فى اختكم الصحفيه انفع ولا؟انا عارفه ان الاسلوب عايز يتحسن شويه بس اهو ادينى بحاول

النادى الاهلى

بيب بيب اهلى بيب بيب اهلى .الاهلى زعيم الكل و حارق دم الكل.معلش يا جماعه اصلى اهلاويه متعصبه اوى وبحب الاهلى جدا واهلا بكل الاهلاويه الجامدين وهتلقونى بكتب اخبار كتيييييييير عن الاهلى كل لما تسمح الظروف

وتحياتى لكل الفرسان الحمر ومبرووووووووك يا شوقى على الجواز والف سلامه عليك يا بركات معلش الار وحش

وتحيه كبيره جدا للمرعب عماد متعب.وسلامى لكل الزملكاويه المساكين.بيب بيب اهلى اهلى اهلى

شكرا

شكر كبيييييييييييييييييييييييير اوى للباشمهندسه نوران على بوست الترحيب الجامد اللى عاملتهولى وده مش غريب على نوران ام الكرم كله "والله مش مجامله"دى حقيقه شكرا كمان مره يا نورا يا جامده.اشوفك على خير.سلام

قلم رصاص

حياتنا بقت عامله زى القلم الرصاص سهل اوى نكتب صفحه جديدة وسهل جدا نمسحها فى ثانية واحدة.الحياه بقى لونها رمادى زى لون القلم الرصاص مبقاش باين فيها الابيض ولا حتى الاسود وده اللى مخلى الحياه صعبه اوى مبقاش باين الخير من الشر مبقاش باين الطيب من الشرير وده اللى مخلينا نخبط فى بعض وبقينا مستنين ومتوقعين ضربه غادره من اقرب الناس لينا وانا بقى مش لقيه حل اتغلب بيه على اللون الرمادى خاصه انى اضربت كذة ضربه من اقرب الناس ليه.لو عندكم حل اقولولى

معنى جميل

بعد ما اتفرجت على فيلم" اوقات فراغ" فضل معلق فى دماغى مشهد واحد هو ساعه لما طارق صاحبهم مات وهو شايل ازايز الخمرة فى ايده وقالهم كلمه فضلت تتردد فى ودانى قالهم "خايف اقبله"قاصده يقابل ربنا قعدت افكر انا بجد مستعدة اقابل ربنا طب لو موت دلوقتى هاقدر اقابله؟!طب هاقوله ايه؟انا عملت ايه ممكن اتفاخر بيه ادامه؟ملقتش اجابه لكل الاسئله دى وخفت اوى وقولت لازم احاول اصلح من نفسى شويه يمكن اعمل حاجه كويسه.ربنا يقدرنا جميعا على فعل الخير

لحظة مصارحة

عمرك فكرت تعمل لحظة مصارحة مع نفسك .ممكن تكون الاجابة اه او لأ .طب لو طقت فى دماغك وحبيت تعمل جلسة مصارحة مع نفسك هاقولك شويه اسئله تسألها لنفسك زى :
1-انا عايش ليه؟
2-بعمل ايه فى حياتى؟
3-عملت حاجه انفع بيها دينى وبلدى؟
4-ذنوبى كترت اوى اعمل ايه عشان اقللها؟
5-مستعد اقابل ربنا؟
6-لو سالنى عملت ايه هاقولوا ايه؟
7-ربنا راضى عنى؟
8-باباوماما راضيين عنى؟
9-انا راضى عن نفسى وحياتى؟
10-الدنيا دى يعنى ايه؟
11-الدنيا يعنى خروج وفسح وضياع بس؟
واسئلة تانى كتييييييييييير اوى الواحد لازم يجاوب عليها ولحظه المصارحة دى مهمه جدا عشان نعرف احنا فين وبنعمل ايه فى دنيتنا. اهم حاجه ان المصارحة لازم تكون مبنية على الصدق مع النفس عشان يكون لها لازمه ونفع ونقدر نصلح من نفسنا

كلمة لكل عاشق

هل تؤمن بالنظرة الأولى؟ هل تؤمن بالتضحية من اجل الحب؟ هل تؤمن بتحول الحب الى كراهية ؟ هل تؤمن بالحب الأول ؟ هل تؤمن بما يسمى الحب الحقيقى ؟ كلها أسئلة تتردد فى ذهنك تحاول ايجاد اجابه لها ولكن ترى ما معنى كلمة حب ؟
تظل تفكر طويلا تسهر الليالى تعيش وبداخلك شعور غريب امتلكت النجوم ووصلت لعنان السماء فتقول انك فى حالة حب.....لكنهل لديك معنى لتلك الكلمة ؟
انها كلمة لا تستطيع تحديد معنى لها ملىء بالمشاعر الجميلة والاحاسيس الرقيقة شعور بالخوف على من تحب والخوف منه.....!
فعندما تعيش بكل هذه الاحاسيس فاعلم وتأكد انك تعيش ما يسمى بالحب الحقيقى

voting

بما انى زعلت جدا بعد لما عرفت ان زيدان هو اللى اخد جايزة احسن لاعب بعد السلوك الغير حضارى اللى عملوا وعشان حسيت انهم بيجملوه فعيزاكم تقولولى احسن لاعب يستحق الجايزة دى وكمان احسن جول فى رايكم انا عن نفسى برشح بوفون احسن لاعب واحسن جول بتاع ديلبيرو اللى جابوا فى المانيا.وانتوا بقى ايه رايكم؟

عن العشق والهوى

ده مش عنوان البوست ده فيلم أحمد السقا الجديد وبالرغم من انى من عشاق أحمد السقا الا انى هقول ان الفيلم ده فاشل بكل المقاييس وعمري ما كنت اصدق ان أحمد السقا ومنى زكى يعملوا فيلم زى ده انا دخلته امبارح انا ونوران ونانسى أصحابى ومش قادره اقولكم على القرف اللى كنا حاسين بيه ومكناش احنا لوحدنا اللى كان ده رد فعلنا .قصة الفيلم ان كله بيحب فى كله هى دى القصة أحمد السقا بارد ومش ماشى فى الدور ده خالص منى زكى دورها صغير وخالد صالح وطارق لطفى ضيوف شرف نصيحة محدش يدخل الفيلم ده وبالذات اللى بيحبوا أحمد السقا ده فيلم أوقات فراغ اللى كله وجوه جديدة احسن من فيلم السقا مليون مره

GO ITALIA

مبروووووووووووووك لكل اللى بيشجعوا ايطاليا على كاس العالم وعقبال كل دورة وكان نفسى النهائى يكون بين ايطاليا واسبانيا لأنى بعشق البلدين دول ياله المهم ان ايطاليا كسبت ومبروك كمان مرة لكل اللى بيحبوا ايطاليا او اللى بيحبوا الكورة الحلوة .واكتر حاجة مزعلانى ان كاس العالم خلص وهنرجع للعك المصرى تانى بس اللى هيصبرنى ان النادى الأهلى موجود وانه هيصبرنا بلعبه عقبال كاس العالم اللى جاى.نعمل ايه ده قدرناوتحياتى لمحبى بوفون وتوتى وراؤول وفيجو.وكل كأس عالم وانتوا طيبيين وبخيروعوده محمودة للعك المصرى قصدى الدورى المصرى

بطاقة تعارف

هاااااااااااااااااااااااااى يا جماعة انا اسمى رضوى خلصت ثانوية عامة ومستنية النتيجة على فكرة انا صاحبة نوران صاحبة بلوج شمعة وهى اللى عارفتنى على موضوع البلوج ده وحلم حياتى ادخل كلية اعلام واطلع صحفية او معدة برامج وممكن ساعات تلقونى تقمصت دور الصحفية واديها كتابه مقالات وساعات هظهرلكم مواهبى فى كتابة القصص والشعر بس ده هيكون حسب الوحى بتمنى اتعرف على اصحاب جداد ويارب يعجبكم البلوج بتاعى ومتنسوش تدعولى اناونوران وكل اللى فى ثانوية عامة عشان النتيجة قربت .بااااى

حكاية قطة

معرفش اذا كانت نوران حكتلكم عن رعبها من القطط ولا لأ المهم انها بتموت من الخوف منهم معرفش ليه مع ان القطط جميلة جدا وانا بموت فيهم.وحكايات نوران مع القطط كتيرة منها السنة اللى فاتت بعد درس الكيمياء كانت الساعة حوالى 12.5 (مساءا) والمكتبة اللى كنا بنصور منها كلنت ادام بيتها وقالت لنا انا طالعة اجيب حاجات من البيت عقبال متخلصوا وبعد5دقايق لقناها نازلة ووشها احمر اوى وبتقلنا حد يطلع معايا لحسن فيه قطة سودا وقفة وشكلها غريب ومعندهاش صوت طبعا موتنا من الضحك وطلعت معاها ايه صاحبتنا.وله لما عرفت انى جبت قطة كان يوم كوميدى وكانت قاعدة هتموت من الخوف.كفايه كده خليها هيه تكمل لحسن تزعل.اوعى تزعلى يا نورا ده انا بحبك.