المشكله اللى مجننانى هى ان انا كنت كتبت السن رغبه اولى وجاتلى وانا كنت مقتنعه بيها جدا ولما روحت الكليه بعد ما جواب الترشيح جه اكتشفت ان الطلبه اللى واخدين الالمانى لغه تانيه فى الثانويه ملهمش غير قسم المانى وروسى ومجرى تقريبا وانا كنت دخلاها عشان الايطالى والاسبانى اللى انا بعشقهم واللى زاد المشكله تعقيد انهم طالبين فى قسم انجليزى درجه 48 وفى اليابانى 49 وفى الكورى 47.5 وانا جايبه 45 ففرصتى قلت اوى فقررت انى احول اعلام خاصه ان مجموعى يجيبها فانا جايبه 97% بعد اضافه درجات التفوق الرياضى وقالولى فى الكليه طلب التحويل ممكن تاخديه لما الملفات توصل وطبعا هى لسه موصلتش وانا الفتره دى عايشه فى قلق مش طبيعى لحسن موضوع التحويل يحصل فيه حاجه لقدر الله واجبر على انى افضل فى السن وادخل قسم الالمانى واللغه دى انا مبقبلهاش مع انى كنت واخداها فى ثانويه عامه بس انا كنت واخداها عشان الدرجات مش اكتر .انا عارفه انها غلطتى من الاول انى مسالتش على فرصى فى الكليه بس قدر الله وما شاء فعل و احنا بشر والغلط وارد .انا بدعى ربنا ان المشكله دى تعدى على خير وربنا يسترها وتتحل المشكله وتخلص على خير .وهبقى اقولكم الاخبار اول باول .ادعولى يا جماعه
14 comments:
يا بنتي ان شاء الله خير متقلقيش انت بس وسيبيها ع ربنا
ما تخافيش يا دودي
انشاء الله ربنا هايعدلها
دودى
قولتى انك اتعلمتى من تجربتك ـ دة عظيم وهو المطلوب ـ عاوزك تفكرى بطريقة عملية وهى انك حاليا طالبة السن المانى ودة تحدى وانك لازم تحبى الالمانى وبما ان كل علوم الدنيا مكتوبة بهذة اللغة يبقى مستقبلها تمام ولو التحويل الى اعلام مجاش لعدم وجود اماكن تبقى مهيئه نفسيا لدراسة الالمانى واذا التحويل لاعلام تم يبقى خلاص مع تمنياتى بالتوفيق
* ابيتاف
قدر الله وما شاء فعل ربنا يسهل وانا راضيه باللى ربنا كاتبهولى
*nouran
والله سيباها على ربنا والحمد لله على كل حاجه
*cortex
يارب تعدى على خير
*جدو العزيز
عندك حق يا جدو بس ادعيلى موضوع اعلام ده ينفع عشان ابقى مستريحه اكتر
ما تقلقيش من موضوع التحويل دا خالص..طالما انك جايبه نفس المجموع للكليه اللى ح تحولى ليها.,.والتحويل بيتأخر ..انا عملت زيك بالظبط وحولت من صيدله لطب بمجرد ما اخدت جواب الترشيح وفضلت فى طب اربع شهور من غير ملف..عادى...مافيش قلق..وانا معاكى انك تحولى الحقيقه...طموحك ح تحققيه ان شاء الله فى اعلام..احنا مالنا بالالمانى..خلينا فى تيكييرو...ولامورى..بذمتك فيه حد يقول لحد ايش لاباداش...دا انا افتحله دماغه لو قالهالى...بالتوفيق وسمعينا الاخبار
نسيت اقوللك ان الكليات الخاصه لو مافيهاش مكان ح تخلقلك مكان..وانتى فاهمه ليه
* snowmans feelings
بجد رفعتلى معنوياتى جدا مرسيه اوى وانا ماليش فى سكه الكليات الخاصه دى انا عايزه اتعلم مش اخد شهاده بفلوسى ولا ايه يا دكتور
رضوى ريهام الحلفاوي قالتلي ان التحويل بيبقى مفتوح لحد 25 \10 وبتقولك متقلقيش
قلت اوصلك الرسالة من هنا علشان مش هعرف اكلمك اوك يا ستي
انا شايف انك لازم تروحي المكان اللي تحبيه مش المفروض عليكي لكي تحققي هدفك وربنا معاكي ويوفقك
ما تقلقيش خاالص المجموع الكبير ديما بيفتح الطرق بس ربنا معاك .
بس أتعلمى من الدرس بقى بلاش تسرع المره الجايه.
ربنا معاك وماتقلقيش تانى.
ما تقلقيش يا دودى انشاء الله مفيش اى مشكله فى موضوع التحويل ده بس انت حاولى تتابعية باستمرار والخيره فيما شاء الله و انشاء الله تحققى كل اللى انت بتتمنيه
تحياتى
* الباشمهندسه نوران
انا بدات اجراءات التحويل وربنا يسهل
* محمد مفيد
عندك حق والله ربنا يوفقنا كلنا
* wa3d el3oyoon
فعلا التسرع ده حاجه وحشه اوى وربنا يستر بقى
* sherif gharib
ربنا يسهل يا شريف والموضوع يكمل على خير
نصيحه
أنتباه
نصيحه
بلاش تحويل
أختارى روسى
هو اللى شغال كويس
ودراسته سهله ومعظم السياح من روسيا
وماذلنا نعتمد على مرشدين أجانب
أسمعى كلامى
non italiano
non engleze
non espagnole
La rosso e molto bene
منا بتكلم أيطالى
وصاحب مدونة الغريب بيكلم أيطالى
المهم اللغه اللى شغاله
لو ممكن تدخلى أرشاد بعد كده أديها أيطالى وأنتى الكسبانه
أرشاد يعنى دبلومة مرشد سياحى سنتين بعد البكالريوس
خليكى ألسن
بلاش أعلام
كليه وحشه وفى الأخر تشتغلى مدرسه بالحصه
بلاش أعلام
لو عوزتى سؤال أنا موجوده
toto tempo Sono qui
Cio
هاى ازيك انا بس حبيت اقولك ان الخيره فيما اختاره الله وان انت تحاولى بقدر الامكان انك تتابعى التحويل وربنا يوفقك حاجة كمان انا عوزاكى قبل ما تحولى تصلى صلاه استخاره والى فيه الخير ليكى ربنا هيسهلهولك ان شاء الله
كتكوته
Post a Comment